Marian Rivera By: Nitz Miralles

MISTULANG nag-fashion show si Marian Rivera sa launching niya as the celebrity endorser/image model ng Karimadon, dahil limang beses siyang nagpalit ng damit para ipakita ang mga bagong design.

Nakikita na rin nating isinusuot ng actress ang mga damit ng Karimadon sa Marimar, pictorials at TV guestings.

Two-year contract ang pinirmahan ni Marian bilang endorser at posibleng ma-extend pa’t nakita naming gustung-gusto siya ng may-ari na si Josie Go.

Naglalakihang billboards ng actress ang nakikita ngayon sa Metro Manila at naka-display ang mga litrato niya sa mga branch ng clothing line nationwide.

Bukod sa talent fee, franchise ng Karimadon ang hiningi ni Marian at kung maaayos, sa SM Mall of Asia ito ilalagay.

Ang mommy daw niya ang mag-aasikaso nito para ’di na umalis ng bansa at makasama na niya rito.

Samantala, ayaw pangunahan ni Marian ang GMA Network, kaya kahit naglabasan nang siya si Dyesebel at kahit nag-pictorial na, ayaw pa ring kumpirmahin.

Pati ang balitang si Dingdong Dantes pa rin ang kanyang makaka-pareha at gaganap sa role ni Fredo ay smile lang ang sagot ng actress.

Malapit nang matapos ang Marimar, kaya ayaw nang palakihin ni Marian ang isyung war na naman sila ni Katrina Halili at nagde-dedmahan na naman sila sa taping.

Mabuti at hindi naaapektuhan ang rating ng telenovela sa on and off friendship ng dalawa.